Ризикот од хоспитализација поради инфекција со делта варојантата на КОВИД-19 веројатно е двојно поголем отколку кај случаите на зараза со алфа варијантата, произлегува од истражувањето објавено викендов.
Научниците од Универзитетот Кембриџ и Агенцијата за јавно здравје на Англија, анализирале над 40 илјади случаи на КОВИД-19 во Англија од крајот на март до крајот на мај 2021. Резултатите објавени во научното списание Lancet Infectious Diseases, главно се однесуваат на невакцинираните, а за ревакцинираните не можат да се извлечат заклучоци од анализираните податоци.
Досега, студиите генерално докажуваа дека делтата е позаразна, но немаше сигурни податоци за ризикот од тешка форма на КОВИД-19.
Истражувачите утврдиле дека ризикот од хоспитализација е во просек 2,26 пати поголем кај делта варијантата.
Од 40.000 случаи во студијата, само 1,8 проценти биле целосно вакцинирани, што истражувачите го толкуваат како потврда за високата ефикасност на вакцината. Од заразените во студијата, 74 проценти биле невакцинирани, а 24 проценти делумно вакцинирани.
“Нашата анализа нагласува дека во отсуство на вакцинација, секоја епидемија на делта ќе наметне поголем товар на здравствениот систем отколку алфа епидемијата“, вели една од авторките на студијата, Ана Пресанис од Универзитетот Кембриџ.
“Целосната вакцинација е клучна за намалување на индивидуалниот ризик од симптоматска инфекција со делта сојот и што е подеднакво важно, за намалување на ризикот од тешка болест и прием во болница за пациент заразен со делта сојот“, додава таа.
Делта варијантата која за првпат е забележана во Индија, сега е доминантна во многу земји, а експертите очекуваат таа да ги надвладее другите варијанти на глобално ниво, доколку не се појави уште позаразен вирус.
