Време е на одмори, па оттука најверојатно веќе и сте се сретнале со „досадната“ морска трева. Но морската трева сепак не е толку лоша. Напротив. Можеби таа е следната намирница која би требало да ја додадете во вашата исхрана, со оглед на тоа дека содржи изобилство на хранливи материи. За што всушност се работи и како воопшто се консумира морската трева?
Поимот морска трева се однесува на морски растенија попознати како алги, неколку видови на морски алги. Тие се развиле од копнени растенија, а денес вообичаено успеваат исклучиво во солените води низ целиот свет, и тоа во плитките крајбрежни области, бидејќи за раст им е потребна сончева светлина
Морската трева е богата со витамини и минерали, додека во исто време содржи малку калории. На пример, половина чаша сурова морска трева содржи само 26 калории.
Како и повеќето копнени зеленчуци, алгите содржат витамини А (бета каротен) и Ц. Исто така, се богати со калиум, железо, калциум, јод и магнезиум, минерали кои се сконцентрирани во морската вода. Морската трева е и еден од ретките растителни извори на витамин Б-12.
Кои се придобивките од морската трева?
Морската трева е одличен извор на јод, кој е клучен за здравјето на тироидната жлезда. Исто така, е одличен извор на витамин Ц, кој помага во функционирањето на имунолошкиот систем, како и железо, кое помага во пренос на кислородот и енергијата низ телото. Покрај тоа, богат извор е на витамин А, аминокиселини, бројни витамини од групата Б, како и калиум и магнезиум, кои се добри за коските и срцето.
Морската трева е честа состојка во јадењата на азиската кујна. Можете да ја пронајдете во суши, а во јапонските ресторани можете дури и да нарачате салата од алги. Во некои продавници има и сушена морска трева во форма на грицки. Може да ја пробате и спирулината, сино-зелена алга, која можете да ја додадете во вашето утринско смути, а која ќе ви ги обезбеди потребните протеини, витамин Б и железо.
Кога треба да се избегнува морска трева?
Иако грицкањето морска трева е генерално добра работа, секогаш е можно да се претера. Повеќето луѓе би требало да јадат навистина големи количини за да им наштети, но некои видови на морска трева се многу солени. Исто така, ако имате проблеми со бубрезите, тироидната жлезда или висок крвен притисок, задолжително консултирајте се со вашиот лекар пред да консумирате морска трева.
