Одредени јаглехидрати од нори алгата би можеле да доведат до промени во цревната микробиота така што поттикнуваат пролиферација на одредени пробиотички соеви, кои ќе го подобрат здравјето, покажало новото истражување.
Истражувањето било спроведено на глувци за да се утврди дали е можно да се манипулира и да се поттикне пролиферација на целниот сој на бактерии со воведување на одредени прехранбени намирници.
Научниците посетиле станица за прочистување на отпадните води, со цел да најдат бактерии од родот Bacteroides, кои се во можност да ја сварат нори алгата, намирница која ретко се консумира меѓу западната популација. Ги издвоиле оние бактерии кои можат да го преработат јаглехидратот наречен порфирен, кој се наоѓа во нори алгата.
Потоа на бактериите биле изложени три групи на лабораториски глувци. На двете групи им ја уништиле цревната микробиота и ја замениле со онаа од здрави луѓе, додека третата ја имала вообичаената цревна микробиота на глувци.
Глувците биле хранети со нормална храна за глувци и било утврдено дека бактериите од родот Bacteroides се населиле во две групи на глувци во ограничена мера, додека третата група во потполност ги отфрлила.
Но кога глувците биле хранети со нори алга, богата со порфирен, родот Bacteroides се населил во голем број кај сите глувци. Популацијата на бактерии зависела од количината на алгата со која научниците ги хранеле
Напредокот во науката, особено во областа на манипулација на цревната микробиота, ги носи научниците чекор поблиску до пронаоѓање на персонализирани здравствени решенија, пишува „Nature“.
