„Закрпата за срце“ која се состои од милион живи матични клетки би можела во голема мера да им помогне на пациентите кои претрпеле срцев удар, обновувајќи го ткивото оштетено со инфарктот, покажало новото истражување.
„Закрпата“ голема отприлика 3х2 сантиметри која се зашива на срцето, би се ’одгледала’ во лабораторија од матични клетки на самиот пациент, а потоа би требало да се ’претвори’ во здрав срцев мускул кој работи. Освен тоа „закрпата“ испушта хемиски елементи кои помагаат да се обноват и регенерираат постоечките срцеви клетки, пишува Би-би-си.
Првите експерименти успешно се спроведени на зајци и зафатот, се чини, успешен, рекле стручњаците од Кралскиот колеџ во Лондон на конференцијата во Манчестер. Тестирањата на пациентите би требало да почнат во следните две години, пак, тврдат од Британското кардиоваскуларно здружение.
До срцев удар доаѓа кога запушената артерија го блокира текот на крвта кон срцевиот мускул, заради што срцето останува без кислород и хранливи материи. Тоа може да му наштети на срцето и да доведе до неповратно откажување на органот.
Срцевиот удар погодува секоја година речиси еден милион луѓе во Велика Британија. Научникот, доктор Ричард Јабур изразил желба оваа иновативна „закрпа“ да стане стандард.
„Еден ден се надевам дека срцевите закрпи ќе станат облик на лекување кој докторите ќе го користат рутински кај пациентите со срцев удар. Би било добро кога една од тие закрпи би можеле да ја препишеме заедно со лековите, односно да може да се земе од полиците и веднаш да се „вгради“ во пациентите“, рекол д-р Јабур
Професорот Метин Авкиран од Британското здружение за срце,пак, истакнал: „Срцевиот удар е исцрпувачка состојба која го менува животот, а нема лек, па и тоа како го отежнува секојдневниот живот на пациентите. Кога би можеле да го закрпиме срцето и да му помогнеме да зацели, сигурно би го смениле исходот за многу од тие луѓе.“
