Познато е дека пушењето е штетно за здравјето и дека значително го зголемува ризикот од појава на смртоносни болести како што е карциномот, а тоа особено се однесува на белите дробови. Ако и понатаму го занемарувате фактот дека пушењето го зголемува ризикот од белодробни болести и и понатаму секојдневно го вдишувате чадот од цигарите, би требало внимателно да го бирате она што ќе се најде на вашата чинија (ако е воопшто возможно барем малку да ја намалите штетата).
Имено, најновите истражувања покажале дека одделни намирници можат да го подобрат здравјето на белите дробови, па затоа е пожелно да се најдат на вашето мени, ако сте пушач. Во истражувањето учествувале 680 луѓе од кои некои биле пушачи, некои поранешни пушачи и непушачи, а одговарале на прашања врзани за нивната моментална исхрана. Сите биле подложени на мерење на спирометар, метод со кој се мери белодробната функција, односно белодробниот волумен и брзината на протокот на воздух низ дишните патишта за време на вдишувањето или издишувањето. Тестот е повторен и по 10 години.
Резултатите од истражувањето покажале дека пушачите кои консумирале многу јаболка, банани и домати имале најмалку оштетувања на белите дробови во текот на тој период. Научниците објаснуваат дека причината е во тоа што овие намирници се богати со антиоксиданти кои помагаат во намалувањето на воспаленијата на дишните патишта, потенцијално го подобруваат здравјето на белите дробови и помагаат при обновувањето на оштетеното ткиво на дробовите кое настанало со долгогодишното пушење.
