Јогата е комбинација од вежби за духот и за телото, која во последно време буди се поголем интерес меѓу луѓето. Но освен за возрасните, јогата може да биде полезна и за децата. Прочитајте какви се бенефити ваквиот тип на тренинг може да им донесе на најмаладите.
Како и сите вежби и јога позите го подобруваат физичкото здравје. Телото станува пофлексибилно и посилно, бидејќи го користи максималниот капацитет на своите мускули. Покрај тоа, децата преку јогата го подобруваат и држењето на телото.
За добар баланс и координација
Некои родители ги запишуваат своите деца на јога бидејќи асаните ги учат младите да си го познаваат телото, да ги координираат своите движења и да ги балансираат силните и слабите страни. Јогата ја развива фината моторика и ги учи децата да се движат посигурно, а колку повеќе напредуваат, толку повеќе стекнуваат самодоверба.
За подобра концентрација
Познато е дека јогата им се препорачува на луѓето кои имаат потреба да се изолираат од надворешниот свет, како и на оние на кои им е тешко да се концентрираат. Јогата ќе му помогне на детето да добие контрола над вниманието и концентрацијата што подоцна ќе му користи на училиште.
Вид терапија
Јогата смирува и може да се користи како емоционална оддишка. Се препорачува при стрес и ослободување од напнатоста. Техниките за дишење и некои пози ќе го направат детето поспокојно и поопуштено, така што ќе може полесно да ги контролира своите емоции кога е во невообичаена средина. Јогата често се препорачува како вид на терапија за деца кои страдаат од аутизам или имаат посебни потреби.
Јога пози за деца
Сите јога пози не се соодветни за деца. Најчесто вежбите ги вклучуваат следните асани: пеперутка, изгрејсонце, зајдисонце, дрво, авион, риба и лак.
