Во текот на животот, може да се појават многу причини за отстранување на тетоважите. Ако се појави некој проблем и потребно е да се отстрани тетоважата, добро е да се запознаете со начинот на отстранување и евентуалните последици.
Постојат повеќе начини за отстранување на тетоважа.
Ласерското отстранување подразбира продирање на ласерските зраци во длабочината на кожата и разбивање на компактните честички на бојата во ситни фрагменти. Ласерите имаат една бранова должина која може да елиминира само одредена група на пигменти. Тоа е причина поради која ласерот не може истовремено да ги отстрани сите бои во шарена тетоважа. Порано биле потребни и до 2 години тетоважата да се отстрани потполно или делумно, а сега со новите видови на ласери тоа се прави многу побрзо, но и тие не може да гарантираат целосно отстранување на тетоважата. Непосредно по третманот се појавува мал оток и пецкање. Бројот на третмани е индивидуален и зависи од видот на бојата.
Дермоабразијата е метода, која ретко се прави без појава на лузна. Кај повеќето тетоважи бојата се наоѓа во дермот, односно во третиот слој на кожата. Дермоабразијата е механичко отстранување на кожата со дијамантска шмиргла и често се користи кај опсежни лузни од акни или длабоки брчки. Кај тетоважите отстранувањето на третиот слој од кожата мора да биде проследено со појава на различна пигментација на кожата или лузни.
Хирушкото отстранување на тетоважата секогаш остава лузна. Ако тетоважата е мала, лузната може да биде и незабележителна, но ако се работи за голема, лузната нема да биде ни малку пријатна.
Салиабразија е многу стара метода со шмирглање на кожата и нанесување сол на третираната регија. Со шмирглањето се отстрануваат слоевите на кожата и се извлекува пигментот. Лузните се чести.
Мезотерапијата или вбризгнување на активни супстанци не може да ја отстрани тетоважата, но може да го ублажи пигментот разбивајќи ја компактноста на честичките во бојата.
Не се сите кандидати за отстранување на тетоважа. Лицата кои за време на тетовирањето реагирале со појава од келоид или хипертрофични лузни, при отстранувањето може да очекуваат поголеми проблеми. При процесот на отстранување, пациентот мора да има трпение и да биде дисциплиниран. За време на третманот строго е забрането лупење на кожата и изложување на сонце. Третманот може да трае и неколку месеци. Комплетно отстранување никогаш и со ниту еден метод не е можно.
