Нема ништо поважно од здравјето, факт кој најчесто го забораваме во динамичниот начин на живот и на кој се потсетуваме тогаш кога, не дај Боже, ќе го изгубиме.
Постојат три основни показатели кои упатуваат на тоа дали лицето е во фит состојба и здраво. Бројки кои го откриваат нашето здравје, а се поважни од дебелината и дневниот внес на калории.
Ако ги држите под контрола овие бројки не само што се ослободувате од вишокот на килограми, туку сте и чекор поблизу до здрав живот. Еве на што треба да внимавате, советуваат специјалистите.
Крвен притисок
За покачениот крвен притисок може да се каже дека е болест на денешницата, а токму одржувањето на овие нормални вредности може да спречи бројни инциденти, од срцев до мозочен удар. За да бидете сигурни дека не спаѓате во ризична група, проверете го вашиот притисок и споредете го со овие вредности.
- Нормален крвен притисок е 120/80,
- Притисокот помеѓу 120/80 и 139/89 се нарекува прехипертензија,
- Висок крвен притисок е 140/90 и погоре.
Хипертензијата (висок крвен притисок) го зголемува ризикот од мозочен удар, инфаркт, артериска аневризма и хронична бубрежна болест. Хипертензијата или високиот притисок уште се нарекува и тивок убиец.
Обем на половината
Погледнете ја вашата половина и ќе знаете дали сте здрави, велат експертите. Имено, висцералните масти (салото на стомакот) испраќаат токсини низ целиот организам. Секои пет сантиметри плус од нормалниот обем на половината го зголемува ризикот од смрт за 9 отсто, предупредуваат истражувањата. И додека индексот на телесна тежина (BMI) ни кажува колку килограми имаме вишок, тој не ни открива информација за тоа каде е распоредено масното ткиво.
Истражувањата покажуваат дека обемот на половината кај жени над 88 сантиметри и кај мажи над 102 сантиметри може да ги зголеми шансите за хронични болести како што се дијабетес и срцеви заболувања.
Обемот на половината на жените треба да биде до 80 сантиметри, а кај мажите 93.
Обемот на половината кај жени над 88 сантиметри и кај мажи над 102 сантиметри може да ги зголеми шансите за хронични болести како што се дијабетес и срцеви заболувања
Ниво на холестерол
Холестеролот е најпопуларната маснотија во организмот присутна во секоја жива клетка. Разликуваме добар HDL холестерол и LDL лош холестерол, чие зголемено ниво во крвта предизвикува можни кардиоваскуларни заболувања, срцев и мозочен удар.
Количината на холестеролот не зависи само од внесот преку храна, туку се создава и во телото. Се верува дека околу 20 проценти од вкупниот холестерол во организмот доаѓа преку храната, а околу 80 проценти се синтетизира во црниот дроб. Холестеролот се изразува со меѓународна единица мерка mmol/l (милимол на литар). Некогаш за здрава се сметаше вредноста до 7 mmol/l, а денеска препорачаните вредности на холестерол за возрасни се до 5 mmol/l.
Зголемувањето на ЛДЛ (лошиот) холестерол предизвикува постепено таложење на мастите во артериите и капиларите, со што постепено предизвикува атеросклероза, а со тоа и срцев, како и мозочен удар. Затоа е дефинирана неговата највисока препорачана вредност, која треба да биде помала од 3,0 mmol/l.
