Гушењето со храна се случува многу почесто од што мислиме, а последиците може да бидат потешки од закашлување и болка во грлото. Во повеќето случаи помошта не може да стигне толку брзо колку што е потребно, па вашата судбина е во рацете на околината и нејзината реакција. Мошне е важно секој да умее да го изведе Хајмлиховиот зафат кој може да спаси живот. Целта на овој зафат е да се поткрене дијафрагмата на личноста која се гуши за да го исфрли воздухот од белите дробови, но и парчето храна кое предизвикало гушење. Ако личноста која се гуши е свесна и кашла, туѓото тело кое прави проблеми може да го исфрли и сама.
Кога треба да се реагира?
Ако личноста не кашла, не може да дише или зборува, со раце бара помош, се држи за вратот… Тогаш треба веднаш да ја започнете постапката на изведување на овој зафат.
- Кажете и на личноста да стане.
- Застанете зад личноста која се гуши.
- Навалете ја нанапред и 5 пати удрете ја по грбот со дланката.
- Рацете поставете ги околу половината на личноста која се гуши.
- Стегнете ја раката во тупаница и поставете ја точно над папокот.
- Со другата рака фатете ја тупаницата и повлечете кон внатре и нагоре во истовреме. Изведете 5 вакви потези.
- Продолжете да повторувате се додека личноста не ги исфрли парчето и почне да дише и кашла.
Доколку се случи до гушење кај трудница, процедурата е малку поразлична. Раката треба да се стави малку повисоко на торзото, на средината од градниот кош.
