Бубрежна слабост (инсуфициенција) е состојба која може да се појави како реакција на одредена акутна состојба што ги оштетува бубрезите или да биде резултат на хронична болест која може да предизвика нивна намалена функција. Со оглед дека бубрезите имаат значајна улога во функционирањето на целиот организм, тие го вршат филтрирањето на крвта и елиминирањето на непотребните продукти од телото, прават баланс на електролитите во телото и го стимулираат создавањето на црвените крвни клетки, а го контролираат нивото на крвниот притисок, појавата на бубрежна слабост може сериозно да влијае на целокупното здравје кај пациентот. Во случаи кога ќе откаже работата на едниот бубрег, целосната функција на бубрезите ја извршува вториот здрав бубрег. Во ситуации кога се зафатени и двата бубрега и болеста доцна е откриена овие болни најчесто завршуваат на дијализа и се евентуални кандидати за бубрежна трансплантација.
Најчести состојби кои може да доведат до намалена функција и оштетување на бубрезите се:
- Намален волумен на крв како резултат на крвавење;
- Дехидратација (при повраќање, дијареја, треска, потење);
- Мал внес на течности;
- Земање на диуретици – лекови за исфрлување на водата од телото преку уринирање. Од другите лекови спаѓаат нестероидни антиинфламаторни лекови и одредена група антибиотици;
- Нарушена циркулација на крв заради опструкција на крвните садови кои ги снабдуваат со крв бубрезите;
- Сепса – состојба на силна инфекција на која бурно реагира имуниот систем.
Симптоми
Бубрежната слабост на почетокот може да не дава никакви симптоми. Загрижувачки е што болниот може да изгуби и до 90 % од функцијата на бубрезите без да почувствува никакви знаци и симптоми. Со развојот на болеста симптомите се јавуваат како резултат на неможноста да се регулира водата и електролитниот балансво организмот, отстранувањето на токсините од телото е нецелосно и се јавува неправилна продукција на црвените крвни клетки.
- Намалено уринирање или целосно прекинување на урината во рок од 24 часа;
- Слабост;
- Недостаток на здив;
- Отоци;
- Зголемeнa киселост на организмот;
- Замор;
- Губење на апетит;
- Повраќање;
- Дезориентираност;
- Грчеви на мускулите.
Третманот на бубрежната инсуфициенција се движи во три насоки. Првата е конзервативен третман со цел да се нормализира рамнотежата на состојките во крвта – пред се, контрола на калиумот и калциум во крвта. Ако конзервативниот третман не даде резултат, пациентите се кандидати за дијализа, односно во краен случај се прави трансплантација на бубрег.
