Камењата во уринарниот тракт се трето најчесто заболување на овој систем во организмот, по уринарните инфекции и болестите на простата. Почесто се јавуваат кај мажите и тоа на возраст помеѓу 40-тата и 60-тата година. Камењата претставуваат една од причините за појава на болка во бубрезите (колика) која се смета за една од најсилните болки. Дури и лесното поместување на бубрежните камења може да предизвика страшни болки кои многу често се споредуваат со болките кои жената ги има за време на породувањето. Голем број клинички студии докажале дека под зголемен ризик за појава на уринарни камења се лица со поголема телесна тежина и лицата кои не внесуваат доволно течности во организмот.
Симптоми при појава на камења во уринарниот тракт се: болка во вид на типична бубрежна колика, како и болка во слабинскиот дел која се шири кон препоните. Болката е многу силна, може спонтано да се намалува и повторно да се засили. Еден од типичните симптоми е и крв во урината која многу често помага во дијагностицирањето на состојбата. Доколку како симптом се јавува и треска потребно е брзо реагирање и отстранување на камењата. Често се јавуваат и чувство на гадење и повраќање.
Превенциија
Со практикување на овие три едноставни навики ќе им помогнете на бубрезите да работат правилно и ќе ја спречите појавата на камења.
Пијте многу вода. Дехидратацијата е главна причина за создавање бубрежни каменчиња. Се препорачува една чаша вода да се пие на секој час, посебно во летните денови, кога температурите се многу високи и побрзо доаѓа до губење на течноста во организмот. Знаците на дехидратација се замор, губење на апетит, сува кожа, нетолеранција на топлината, темножолта урина, сува кашлица
Намалете го внесот на сол. Со ова ќе го намалите и калциумот во урината бидејќи зголеменото количество на калциум е, исто така, причина за појава на каменчиња. За почеток, тргнете го соларникот од вашата маса и не додавајте дополнително сол во оброкот. Избегнете да јадете премногу солени производи: преработени месо, инстант супи, чипсови и брза храна.
Јадете цитрусни овошја. Портокали, цитрони, лимони, мандарини богати се со нитрати кои позитивно делуваат на вашето уринарно здравје.
Дијагноза
За дијагностицирање на оваа состојба се користи широк спектар на дијагностички методи, вклучувајќи го клинички преглед, нативна графија на уринарниот тракт, ехо, интравенозна урографија (контрастно испитување на уринарниот тракт). Кај пациенти кои се во акутна фаза на болка и кога контрастните испитувања не се возможни, како дијагностичка метода се користи компјутеризираната томографија.
