Недостатокот на вода во телото го нарушува јасното размислување

Истражувачите откриле дека губењето на течности резултира со нарушување на когнитивните функции

Дури и умерената дехидрираност може да ја наруши вашата способност да размислувате јасно, покажала новата американска студија. Истражувачите откриле дека губењето на течности, кои одговараат на два проценти од тежината на спортистите, резултирало со нарушување на когнитивните функции. Дури и блага до умерена дехидрираност води до пореметување на вниманието и отежнати способности за донесување одлуки, пишува „Medicine & Science in Sports & Exercise.“

Научниците откриле дека дехидратацијата особено предизвикала проблеми во задачите кои барале внимание, моторната координација и т.н. извршна функција, која вклучува, на пример, снаоѓање на мапи, правопис, сметање или лекторирање на текстови

„Веќе знаеме дека физичката кондиција страда кога ќе се премине прагот од два проценти на телесна тежина, особено после вежбање во топла средина“, вели истражувачот Минди Милард – Стафорд, професор на Факултетот за биолошки науки на Институтот за технологија во Џорџија.

Не треба да се оди ни во друга крајност – да се консумираат прекумерни количини на вода, бидејќи тоа може да доведе до опасна состојба – хипонатремија

„Затоа се постави прашањето што се случува во мозокот со исто таква загуба на течности, која е многу честа кај луѓе кои се активни или работат на отворено. Како што на клетките на мускулите им треба вода, таа, исто така, е потребна и на клетките на нашиот мозок.“

Последиците од дехидрираност не се драматични, но се зголемуваат со растот на дехидрираност, изјавил Милард – Стафорд

Експертите предупредуваат и дека не треба да се оди во друга крајност – да се консумираат прекумерни количини на вода, бидејќи тоа може да доведе до опасна состојба – хипонатремија.

Важно е да се избалансира внесот и губењето на течности, велат тие, укажувајќи на едноставен начин за контрола: ако бојата на урината е многу светла, тоа значи дека се внесува многу вода, и обратно, ако е интензивна и темножолта, лицето е дехидрирано.