Обично се вели дека не постои лесна операција. Кога сте во улога на пациент, речиси сме сигурни дека е така. Но од агол на лекарите постојат потешки и полесни хируршки зафати, а постојат и правила до кои треба да се придржувате пред да стигнете до операционата маса. Во зависност од видот на зафатот, пациентот добива упатство за потребните лабораториски и дијагностички прегледи кои обавезно мора да се направат пред предвидената операција, а резултатите не смеат да се постари од 30 дена. Лекарите велат дека пациентите со своето однесување можат значително да придонесат за успехот на операцијата и да го скратат постоперативното опоравување.
Заборавете на цигарите
Иако е познато дека пушењето е штетно за здравјето и понатаму има многу пушачи. Сите кои се обиделе да ги остават цигарите знаат колку може да биде тешко, дури и кога цената е сопственото здравје. Но совет е да го намалите или потполно да го прекинете пушењето барем еден месец пред закажаната операција. Ако ни ова не можете, тогаш не палете цигара барем шест часа пред закажаниот термин. Зошто? Затоа што будењето по операцијата, без оглед на видот на анестезијата, за пушачите умее да биде мошне трауматично, проследено со силно кашлање и гушење.
Без храна и пијалаци 8 часа!
Секогаш ќе добиете упатство ноќта пред операцијата дека не смеете ниту да јадете ниту да пиете. Зошто е важно ова? Пациентот во анестезија нема зачувани рефлекси, паѓа тонусот на мускулите. Затоа е голема веројатноста дека ќе дојде до повраќање на желудочната содржина, која може да се задржи во дишните патишта, што во поблаг случај може да резултира со воспаление на белите дробови, а во најлош случај и со смрт.
Од аголот на анестезиологот, кој како една од задачите покрај отстранување на болката го има и одржувањето на проодноста на дишните патишта. За време на операцијата една чаша вода и килограм помфрит имаат иста тежина. И едното и другото можат да доведат до проблеми со дишните патишта. Затоа запаметете – без јадење и пиење (што подразбира и вода) барем неколку часа пред закажаната операција. Кога зафатот се одвива под локална анестезија, рефлексите на голтањето и кашлањето се зачувани, но никогаш не се знае кога може да дојде до потреба пациентот да се заспие. Заради тоа и во овој слулај е мошне важно да не се внесуваат храна и течности, а се што е потребно, на пациентот ќе му биде обезбедено по венски пат. После операцијата се враќа на нормална исхрана.
Што уште треба да знаете?
Од истите причини важно е да се напомене дека пред операцијата обавезно треба да се извади и вештачката вилица.
Избришете го лакот од ноктите (ова важи и за породувањето). Во случај да дојде до некои компликации, ноктите се прв показател дека нешто не е во ред. Во случај на престанок на работата на виталните органи или гушење – бојата на ноктите се менува, а тоа е невозможно да се види ако има лак.
