Cluster главоболката се смета за најболен вид на главоболка. Ваквиот тип на главоболка вообичаено го буди лицето во сред ноќ. Оваа главоболка може да започне на било која возраст, иако главно се јавува во третата и четвртата деценија од животот. Станува збор за редок вид на главоболка која се јавува кај 0,1% од популацијата.
Се јавува два пати почесто кај мажите, за разлика од мигрената која е почеста кај жените.
ПРИЧИНИ
Причината за cluster главоболката е непознат, но се претпоставува дека доаѓа до дисфункција на хипоталамусот, мозочна структура која е задолжена за голем број важни животни функции.
Тригери за cluster главоболката се:
- Консумирање алкохол
- Силни мириси, како парфеми, бои или бензин
- Пушењето исто така се поврзува со зголемен ризик за појава на оваа главоболка, па на пациентите кои ја имаат и се советува откажување од цигарите.
СИМПТОМИ
Болката е типично локализирана:
- Периорбитално (околу очите) или
- Темпорално ( во подрачјето на слепоочницата) и тоа исклучиво еднострано
Болката кај cluster главоболката обично трае помеѓу 30 и 90 минути, иако се опишани случаи каде главоболката траела и до три часа. Освен болка, на истата страна на лицето се јавува еден или повеќе симптоми на автономниот нервен систем, како што се:
- Потење
- Течење на нос
- Затнат нос
- Солзење на очите
- Црвени очи
- Стеснување на зеницата или спуштен капак
