Квалитетниот сон е од клучно значење за одмор и регенерација на организмот и воопшто за долг живот. Неодамнешна студија покажала дека востановената рутина кога станува збор за спиењето – одењето на спиење и станувањето во приближно исто време секој ден – може да се поврзе со подолг живот.
Траењето на сонот е, исто така, важен фактор – личностите кои навечер спијат помалку од 5 до 7 часа имаат за 12 отсто поголем ризик од рана смрт. Премалото количество сон ја зголемува подложноста на организмот за воспаленија и го зголемува ризикот од развој на дијабетес, дебелина и кардиоваскуларни заболувања, сето тоа посредно влијае и на покус животен век.
Од друга страна, спиењето повеќе од 9 часа дневно може да ги зголеми шансите за рана смрт за 38 отсто. Оваа навика, исто така, се поврзува со депресијата и ниските нивоа на физичка активност што, исто така, неповолно влијае на животниот век.
Идеален рецепт за долговечност би подразбирал, значи, спиење, односно сон во траење од 7 до 8 часа секоја ноќ, со одење на спиење и станување во приближно исто време секој ден.
