Повеќе од 300 милиони луѓе ширум светот патат од депресија, а меѓу нив повеќе се жени. Се проценува дека бројот на депресивни личности ќе се зголеми. Меѓу младата популација (на возраст од 14 до 25 години) двојно повеќе има депресивни девојчиња и девојки, отколку момчиња и момци. Научниците решиле да истражат зошто жените се поранлива група.
Анхедонија (изостанок на радост, уживање во активностите кои некогаш ни биле пријатни) е едно од обележјата за депресивно пореметување. На невролошко поле, анхедонијата претставува намалена активност во подрачјето на мозокот кое реагира на наградување наречено – ventral striatum.
Ова истражување фрла нова светлина на тоа како половите разлики кај депресијата се манифестираат во мозокот. Имено, научниците откриле како воспалението влијае на реакцијата на мозокот на различни дразби кај мажите и жените. Ги поделиле во две групи, контролна плацебо група и група на која и дале ниски дози ендотоксин. Два часа подоцна кога ендотоксинот делувал најјако на мозокот им дале да решат задача во која требало парично да бидат наградени. Притоа мозокот им бил сниман со магнетна резонанца. Мозокот на мажите во делот кој реагира на наградување, различно се однесувал во споредба со мозокот на жените.
„Кај жените ендотоксинот (во споредба со плацебо групата) довел до намалување на активностите во ventrial striatum, додека кај мажите тоа не е забележано“, вели професорката Наоми Ајзенбергер.
„Ова укажува на тоа дека жените со хронично воспалително пореметување се поподложни на развој на депресија од мажите“, додава авторката на студијата доктор Мона Моени.
„Нашата студија е прва која покажува дека мозокот на мажите и жените различно реагира на исти дразби, што игра битна улога во развојот на депресијата“, порачуваат научниците.
