Постелнината во којашто легнувате секоја вечер е многу повалкана отколку што мислите – во неа може да се најдат еден куп габи, бактерии, пот, нечистотија, слуз од грлото…
Сето ова во комбинација со околу 100 литри пот колку што човечкото тело произведува годишно и со остатоците од храна, која повремено или постојано ја грицкаме во креветот значи дека постелата е исклучително плодна почва за развој на габи и бактерии.
„Грините се безопасни, но производуваат измет кој содржи алергени, а тие предизвикуваат чешање на очите, ринитис и астма. Значи, нередовното перење на постелнината може да биде многу опасно за здравјето“, предупредува докторката Лиза Акли на својот блог „The Hygiene Doctor“. Бактериите и габите кои живеат во постелнината значат, на пример, дека многу лесно може од партнерот да добиеме габична инфекција на стапалата, исто така, позната и како атлетско стапало.
Размислете за работите што ги правиме во кревет. Освен што спиеме во него, за некои, исто така, тој служи и како канцеларија, како место каде што се пие чај или кафе, како маса за ручање, а многу сопственици често го споделуваат креветот и со своите домашни миленичиња. Во зависност од тоа за што го користите креветот и колку сте чисти кога одите на спиење (и, се разбира, дали притоа носите пижами), местото на кое треба да се одморите може да биде многу валкано и да му наштети на вашето здравје.
Д-р Акли советува редовно вшмукување на подот околу креветот, перењето на постелнината на висока температура, по можност секоја недела, а ако не сте во можност, на секои две недели, и редовно перење на пижамите, што значи на секои три дена. Најпрво треба да се ослободите од прашината. Исчистете ја собата со правосмукалка, особено околу и под креветот, вшмукајте го и душекот на кој спиете, а перниците перете ги најмалку два пати годишно. Д-р Акли советува перење на постелнината на 60 Целзусови степени, а белата памучна постелнина на 90 степени.
„Ако е можно истуширајте се пред да заминете на спиење и, секако, измијте ги рацете. На ноќната масичка ставете влажни марамчиња, а ако имате куче или мачка, на кои им дозволувате да легнат до вас во кревет, ставете посебно ќебе за нив и перете го секоја недела, а може и почесто“, советува д-р Акли, потсетувајќи дека постелнината треба да се пере почесто ако некој од домот е болен и поминува повеќе време во креветот.
Една британска компанија направи анкета на 2 000 луѓе за тоа колку често ја менуваат постелнината, а резултатите покажуваат дека секој петти испитаник не ја менува ниту еднаш месечно. Истата студија покажа и дека, кога се работи за хигиена во спалната соба, жените се помалку внимателни од мажите и повеќе од половина не ја менува постелнината секоја недела, а 12 проценти од нив го прават тоа еднаш месечно.
Во истата анкета, се покажа дека околу 40 отсто од мажите кои живеат сами ја менуваат постелнината еднаш неделно, а осум проценти од нив го прават тоа почесто.
