Според резултатите на данската студија, во која биле вклучени повеќе од 55 000 луѓе на возраст од 50-65 години, консумирањето на житарки со цели зрна може да помогне во превенција на дијабетес тип 2.
Истражувачите ги поделиле испитаниците во четири групи кои консумирале различни дневни количини на житарки со цели зрна. Мажите во групата што јаделе најмногу житарки со цели зрна имале 34 отсто помал ризик од добивање дијабетес тип 2. За жените во групата со највисок внес, ризикот за дијабетес се намалил за 22 отсто.
Интересно е дека кај жените само со консумирањето на пченица и овес го намалиле ризикот од дијабетес, додека кај мажите и пченица, ‘рж и овес биле поврзани со намален ризик од дијабетес тип 2.
Житарките со цели зрна содржат влакна, витамини, минерали, протеини и фитонутриенти, кои играат важна улога во одржувањето на здравјето. Прехранбените влакна ја намалуваат отпорноста на инсулин и воспаление, што може да придонесе за намалување на ризикот од дијабетес тип 2
Секако, треба да се истакне дека консумирањето на житарки со цели зрна не само што го намалува ризикот од дијабетес тип 2, туку, исто така, го намалува ризикот и од срцеви заболувања и рак на дебелото црево.
Инаку, најголем дел од луѓето со дијабетес имаат дијабетес тип 2. Исто така, треба да се додаде дека од порано е познато дека здравата исхрана и вежбањето играат битна улога во намалување на ризикот од дијабетес тип 2, пишува „The Journal of Nutrition“.
