![КОВИД ПРСТИ 1](https://panacea.mk/wp-content/uploads/2020/11/KOVID-PRSTI-1-696x392.jpg)
Воспалението на прстите што го предизвикува КОВИД-19 може да се манифестира како црвена или виолетова кожа со отоци и пликови, слични на смрзнатини. Симптомите обично се развиваат во рок од една недела од инфицирањето со вирусот и поминуваат сами од себе за две недели. Меѓутоа, кај некои пациенти, проблемите со кожата се манифестација на продолжен КОВИД-19 која кои може да потраат и со месеци откако лицето се опоравува од болеста, односно е негативно на коронавирусот.
Во април оваа година научници од општата болница во Масачусетс во соработка со Меѓународната лига на дерматолошки здруженија и Американската академија за дерматологија, воспоставија меѓународен регистар за кожни манифестации на КОВИД-19.
Лекарите, пред седум месеци своите пациенти ги внеле во овој регистар, повторно ги контактирале во јуни и август пради ажурирање на податоците за траењето на симптомите на КОВИД-19 кои се манифестираат на кожата.
Во регистарот се евидентирани речиси 1.000 случаи на пациенти со кожни манифестации во 39 земји. Анализата на податоците покажува дека кај половина од регистрираните пациенти се забележани КОВИД прсти, чии симптоми во просек траеле 10-15 дена.
![](https://panacea.mk/wp-content/uploads/2020/11/KOVID-PRSTI.jpg)
Но, кај шест пациенти симптомите на КОВИД прсти траеле најмалку 60 дена, а кај двајца проблемот бил присутен подолго од 130 дена. Еден од истражувачите предупредува дека некои пациенти од “КОВИД прсти“ страдаат и 150 дена подоцна, што е речиси пет месеци.
Се чини дека постои одредена подгрупа на пациенти кои кога ќе добијат КОВИД-19 развиваат воспаление на прстите кое ги прави црвени и отечени, а на крајот и виолетови. Во повеќето случаи тоа се решава само од себе и исчезнува. Релативно е благо и во просек трае 15 дена“, вели д-р Естер Фриман, главен истражувач на Меѓународниот дерматолошки регистар на КОВИД-19, и додава дека се забележани и пациенти кај кои тоа траело еден или два месеци.
“Многу изненадувачки е кога ќе се помине таа граница од 60 дена, не е дека пациентите го санираат воспалението во седумдесетиот ден. Факт е дека кај некои пациенти тоа трае над 150 дена. Пациентите имаат црвени или виолетови и отечени прсти со месеци“, вели д-р Фриман и објаснува дека идентификацијата на лицата со КОВИД прсти на научниците им помага во сфаќање на симптомите поврзани со коронавирусот на други делови од телото.
“Долготрајниот КОВИД-19 почнавме да го забележуваме и во други органски системи, а ова е прв пат да препознаеме дека истото може да се случи и на кожата. Мислам дека тоа отвора бројни прашања за тоа какво воспаление се случува и дали тоа постои некаде на друго место во телото“, вели д-р Фриман и додава дека се уште немаат одговор на тоа.