Кромидот, лукот и празот спаѓаат во истата фамилија (Allium) и содржат низа на исти состојки, поради што се класифицираат како зеленчук со исклучително позитивно влијание врз здравјето на луѓето. Имено, членовите на фамилијата Allium содржат уникатна комбинација на флавоноиди и нутриенти, кои содржат сулфур, и имаат потврдено позитивно дејство врз здравјето.
Кромид
Кромидот е многу добар извор на биотин, манган, витамин Б6, бакар, витамин Ц, влакна, фосфор, калиум, фолна киселина и витамин Б1. Но, освен тоа, кромидот е исклучително богат со фитонутриенти, кои имаат позитивно влијание врз здравјето на кардиоваскуларниот систем, ендокриниот систем, дигестивниот систем, имунолошкиот систем и многу други системи во човечкото тело. Консумацијата на кромид потврдено го зголемува нивото на омега-3 оксилипини во црниот дроб, а ова зголемување може да ја објасни способноста на кромидот да помага во регулирање на нивото на масти во крвта, како и нивото на холестерол.
На сите три видови на кромид (бел, жолт и црвен) им се припишуваат антиоксидантно и антивоспалително дејство, па може да се заклучи дека кромидот помага во намалување на ризикот од развој на кардиоваскуларни болести.
Лук
Лукот има бројни позитивни влијанија врз здравјето на луѓето. Тој е одличен извор на манган и витамин Б6, како и многу добар извор на витамин Ц и бакар. Освен овие минерали, лукот е добар извор на селен, фосфор, витамин Б1 и калциум.
Со сечкање на лукот, се зголемуваат неговите позитивни ефекти, а меѓу бројните придобивки по здравјето се нагласува ефектот на намалување на крвниот притисок кај луѓето со дијагностицирана хипертензија, регулирање на нивото на холестеролот во крвта и зголемување на имунитетот. Покрај тоа, лукот е ефикасен во намалување на вкупниот и ЛДЛ холестерол за 10 %, кај индивидуи со малку покачени нивоа на холестерол во крвта.
Нутриционистите советуваат внес на 1-2 чешниња лук дневно за да се активира неговиот позитивен ефект врз здравјето.
Праз
Од овие три зеленчуци, празот е најмалку проучуван, но со оглед на потврдените состојки, има низа на позитивни ефекти врз здравјето.
Празот содржи висок процент на флавоноид кемпферол, кој докажано ги штити крвните садови од оштетување, вклучувајќи го и оштетувањето предизвикано од оксидација. Често се занемарува во истакнување на придобивките од консумацијата на праз високиот процент на фолати, кои се клучни витамини Б комплекс, кои учествуваат во одржувањето на здравјето на кардиоваскуларниот систем, бидејќи влијаат на одржување на рамнотежата на хомоцистеин. Имено, покачените нивоа на хомоцистеин се ризик фактор за развој на бројни кардиоваскуларни заболувања. Во празот се наоѓаат високи дози на антиоксиданти полифеноли, кои играат директна улога во заштитата на крвните садови и крвните клетки од оксидативно оштетување.
