Малку калории, а изобилие од витамини и минерали, ја прават келерабата идеална намирница за во зима. Овој зеленчук од семејството зелки, особено е богато со железо и витамин Ц, кои се пресудни за добар имунитет.
Исхраната богата со келераба му помага на организмот да го сочува здраво сврзното ткиво, забите и непцата, а нејзините антиоксидантни состојки го штитат организмот од инфекции и карцином.
Келерабата, како и други членови на ова семејство, содржат фитохемикалии поволни за здравјето на човекот, како што се сулфорафан и индол-3-карбионол, кои штитат од рак на простата и дебелото црево. Овој зеленчук содржи големи количини на витамин Б комплекс, како што се нијацин, витамин Б6 (пиридоксин), тиамин, пантотенска киселина. Овие витамини се однесуваат како кофактори на ензимите во различни метаболизми внатре во организмот.
Келерабата, освен железо, содржи и други значајни минерали – бакар, калциум, калиум, манган и фосфор. Сите тие се значајни за одржување на нормален метаболизам на клетките и телесните течности, а краен ефект е контрола на срцето и крвниот притисок.
Листовите од келерабата, како и стеблото, исто така се јадат. Содржат многу важни витамини и минерали, особено каротин и фосфор. Листовите се особено богати со провитаминот А, важен за зачувување на здравјето на клетките. Од тие причини нутриционистите советуваат и овие делови да се користат во исхраната, а најдобро во подготовка на чорби.
