Рефлексологијата или рефлексотерапијата е метода во алтернативната медицина која верува дека различните точки на нозете и на рацете одговараат на одредени мускули или органи во телото. Поради оваа причина, рефлексологијата се нарекува и масажа на зони или зонска терапија. Со масирање на овие точки вршејќи мал притисок врз нив, се претпоставува дека телото испраќа сигнали до болната област, влијае на енергетскиот баланс на телото, ги ослободува енергетските блокади и на тој начин лекува.
Во рефлексологијата, телото е поделено на 10 еднакви, вертикални зони – пет од левата и пет од десната страна кои одговараат соодветно на левата рака или нога и на десната рака или нога. Во некои продавници веќе се продаваат специјални ракавици и чорапи на кои се иштрафирани зоните и посочените точки од телото кои може да ги масирате, така што можете рефлексотерапијата да ја практикувате и дома.
Рефлексологијата често се меша со другите методи на алтернативната медицина. Она што ја разликува од класичната масажа е фактот дека при оваа метода се масираат само стапалата и рацете. Иако асоцира на акупунктура поради пристапот со точки, сосема е различно, бидејќи двете методи користат различни точки и вршат различен притисок. Има некои сличности со реики, но таму точките не се притискаат, туку се допираат и работат главно на ниво на енергија.
Се уште не постојат научни докази дека рефлексологијата излекувала одредено заболување но некои поддржувачи на алтернативната медицина сметаат дека третманите помагаат за целокупното здравје на пациентот. Рефлексологијата ја подобрува циркулацијата на крвта, може да делува на мигрена или на главоболки, ослободува од стресот и го лекува заморот. Со оглед дека методата наликува на масажа, рефлексологијата го релаксира телото и се справува со напнатоста и вкочанетите мускули. Исто така, може да помогне во лекувањето на шилците.
