“Немој да хистеризираме. Појавувањето на нови варијанти на некој вирус е сосема нормална појава. Тоа не значи ниту дека вирусот е позаразен, дека полесно се шири, а ниту дека е поопасен. Меѓутоа, новиот сој на коронавирусот мора да се држи на око“, изјави за Би-би-си, проф. Ален Мекнали од Универзитетот во Бирминген, откако вчера министерот за здравство и социјална заштита, Мет Хенкок информираше дека во Велика Британија се идентификувани над илјада случаи на зараза со нов сој на коронавирусот.
Мекнали додава дека новата варијанта е воочена во текот на изминатите неколку недели.
“Се вложува огромен напор во категоризацијата и разбирањето на ширењето на новите варијанти на вирусот. Важно е да се остане прибран и рационален. Како поминува времето, очекуваме да се појавуваат нови варијанти на вирусот, но и некои претходни да исчезнат“, заклучува проф. Мекнали.
Д-р Џереми Фарар вели дека новата варијанта на коронавирусот е потенцијално опасна.
“Надзорот и истражувањето мора да продолжат. Мора да повлечеме адекватни потези за да бидеме чекор пред вирусот“, додава тој.
Професорот по молекуларна вирологија на Универзитетот Нотингем, Џонатан Бол вели дека генетските информации во многу вируси може многу брзо да се менуваат.
“Промените кај вирусот некогап може да овозможат брзо ширење и спротивставување на вакцината, но некогаш не мора да имаат никаков ефект. Иако се појави нова варијанта на вирусот која се шири низ дел од Велика Британија, можно е тоа да се случило сосема случајно“, вели Бол и додава:
“Важно е да се проучуваат генетските промени и да се сфати како влијаат на однесувањето на вирусот. Додека тоа не се направи, секое тврдење за потенцијално влијание на вирусот ќе биде избрзана“.
Според Светската здравствена организација, новата варијанта на коронавирусот се проучува за да се утврди нејзината сериозност.
