Луѓето кои се заразени со вирусот на хумана имунодефициенција (ХИВ) се изложени на поголем ризик од развој на хипертензија, делумно поради самата терапија за ХИВ, а делумно поради болеста, покажала новата студија.
Се смета дека разбирањето на механизмите за развој на висок крвен притисок кај луѓето со ХИВ е од клучно значење за спречување на една од водечките состојби кои можат да предизвикаат предвремено кардиоваскуларно заболување кај возрасни лица со ХИВ. Инаку, во последните десет години, значително е зголемена смртноста од срцеви заболувања и мозочни удари.
Сега, кога луѓето заразени со ХИВ живеат подолго, се позабележителни се неинфективните последици од ХИВ, а хипертензијата е една од нив, истакнуваат експертите.
Бидејќи кај лицата инфицирани со ХИВ, имунолошкиот систем е постојано активен, овие луѓе имаат хронично воспаление на крвните садови. Слично на тоа, антиретровирусните лекови поттикнуваат состојби кои доведуваат до воспаление, а познато е дека воспалението на крвните садови е поврзано со развој на висок крвен притисок. Исто така, не треба да се заборави дека хроничното воспаление може да биде поврзано со цревниот микробиом.
Се смета дека воспаленијата на васкуларниот систем, проблемите со цревниот микробиом, високиот холестерол, бубрежните заболувања поврзани со ХИВ и други состојби кои се присутни кај лицата заразени со ХИВ, се силно поврзани со развојот на висок крвен притисок, пишува „Hypertension“.
