Шокантни податоци: На секои 17 секунди по едно лице се заразува со ХИВ!

Новите дијагнози за ХИВ пријавени за 2016 година претставуваат највисок број на новорегистрирани случаи на ХИВ во евиденцијата за една година

Светот на 1 Декември го одбележува Светскиот ден за борба против сидата, кој годинава се спроведува под мотото „Сите се бројат“, придружено со кампања која ја промовира важноста на еднаквите права на здравје за сите луѓе ширум светот, без дискриминација, вклучително  и за луѓето со ХИВ.

Годинешното одбележување се одвива под слоганот „Сите се бројат“

Неодамнешниот извештај на ЕЦДЦ – СЗО/Европа, укажува на над 160 000 нови ХИВ позитивни дијагнози, регистрирани во Европскиот регион на СЗО во 2016 година. 80 % од новите ХИВ позитивни пријавени лица се од источниот дел на Европа. Бројот на новите дијагнози за ХИВ пријавени за 2016 година претставува највисок број на ново регистрирани случаи на ХИВ во евиденцијата за една година. Африканскиот регион на СЗО е најзагрозениот регион, со 25,6 милиони луѓе кои живеат со ХИВ во 2016 година и учествува со речиси две третини од регистрираните ХИВ инфекции на глобалнио ниво. Се проценува дека во моментов само 70 % од луѓето со ХИВ го знаат нивниот статус. За да се постигне целта од 90 %, дополнителни 7,5 милиони луѓе треба да имаат пристап до услуги за ХИВ тестирање, се вели во текстот објавен на страницата на Институтот за јавно здравје на РМ.

Според податоците на Програмата на Обединетите нации за ХИВ/Сида (UNAIDS) на секои 17 секунди во светот едно лице се заразува со ХИВ, односно 5 000 луѓе дневно. Во 2016 година во светот со вирусот биле заразени 1,8 милиони луѓе. Што се однесува до Македонија, во ИЈЗРМ до 30 ноември 2017 биле обработени 39 пријави за новорегистрирани случаи на ХИВ/СИДА.

КАКО СЕ ПРЕНЕСУВА ХИВ

Преку сексуален однос без заштита т.е. без кондом (анален, вагинален и орален секс, при што највисок ризик носи незаштитениот анален секс)

Од заразена мајка на бебето (за време на бременост, пораѓање и доење)

Преку размена на игли и шприцеви кај интравенска употреба на наркотици

  • ХИВ ретко може да се пренесе на следниов начин:
    • Бакнеж во уста (само во случај ако двете лица имаат некои ранички во устата, на пр., после вадење на заб, крвавење на заб…, односно во случај кога ќе дојде до контакт „крв на крв“)
    • При тетовирање, пирсинг… (доколку истото се врши со нестерилизирани апарати и во нехигиенски услови)
    • При размена на прибор за лична хигиена која претходно ја користело лице кое живее со ХИВ