Во бременоста нема менструален циклус. Може да се појави вагинално крвавење, кое се нарекува токму така – вагинално крвавење и кое нема врска со менструален циклус и кое треба сериозно да се сфати.
Во раната бременост речиси кај половина од трудниците се појавува вагинално крвавење кое во поголемиот број случаи не претставува никаков проблем. Но, за тоа колку е сериозно може да се зборува само откако ќе се направи гинеколошки преглед.
Во поодмината бременост вагиналното крвавење најчесто е сериозно и прави можност да се загрози плодот или трудницата и треба да се сфати крајно сериозно и истото да се третира.
Вагиналното крвавење во раната бременост може да се појави во период на очекуваниот менструален циклус, па лошо се толкува како циклус и всушност бременоста не се препознава.
Понекогаш може да трае колку и редовниот менструален циклус, а и количински може да одговара на менструацијата. Доколку бременоста е посакувана, тогаш не претставува проблем и во првите неколку недели бременоста да не се препознае. Но, ако станува збор за несакана бременосот која е со намера да се прекине, тогаш е многу важно добро да се разликува дали станува збор за вагинално крвавење во бременост или за менструален циклус, поради законските рамки во кои се дозволува прекин на бременост.
Вагиналното крвавење во (рана) бременоста задолжително бара преглед кај гинеколог и соодветно однесување. Понекогаш тоа значи мирување, евентуална препорака за земање на одредени лекови, а понекогаш можно е и да се препорача мирување во болнички услови и парентерално лекување. Понекогаш тоа може и да значи патолошка бременост која е потребно да се заврши или веднаш, итно (во случај на јасна загрозеност на трудницата) или за неколку дена.
При појава на вагинално крвавење во бременоста не смее да се користат тампони или менструални чашки, не смее да се земаат хормонални контрацептиви за стопирање на циклусот (бидејќи не се работи за циклус)…
Она што е важно да се напомене е дека зад секој незаштитен полов однос, независно дали по него дошло до менструален циклус, треба да се направи домашен уринарен тест за бременост, за ненамерно или од незнаење неправилно да се постапи, а во некои ситуации и да се изгуби драгоцено време.
