МЕТАБОЛЕН СИНДРОМ – кои се причините, симптомите и како се лекува

Во Европа метаболниот синдром зафаќа речиси 25 отсто од популацијата, без разлика на возраста.

Метаболниот синдром е збир од состојби – покачен крвен притисок, високо ниво на шеќер во крвта, прекумерна телесна тежина, маснотија околу половината и абнормални нивоа на холестерол – кои се јавуваат заедно, го зголемуваат ризикот од болести на срцето, мозочен удар и дијабетес. Ако имате само еден од овие знаци не значи дека имате метаболен синдром, но треба да се знае дека кој било од овие знаци го зголемува ризикот од сериозни болести. Ако овие знаци се појавуваат во комбинација, ризикот е уште поголем. Ако имате метаболен синдром, драматичните промени на начинот на живот можат да го одложат или дури и спречат развојот на сериозни здравствени проблеми. Во Европа метаболниот синдром зафаќа речиси 25 отсто од популацијата, без разлика на возраста.

ПРИЧИНИ ЗА ПОЈАВА НА МЕТАБОЛЕН СИНДРОМ

Метаболниот синдром вклучува неколку симптоми кои имаат различни причинители. Еден е инсулинската резистенција. Кај луѓето со инсулинска резистенција клетките не реагираат нормално на инсулинот, а глукозата не влегува во клетките лесно. Како резултат на ова нивото на глукоза во крвта расте. Тоа на крајот може да резултира со дијабетес – кога телото повеќе не може да го одржува нивото на глукоза во крвта во нормални граници. Дури и ако нивоата на глукоза во крвта не се доволно високи за состојбата да се смета за дијабетес, зголеменото ниво на глукоза во крвта и понатаму може да биде штетно. Зголемената отпорност на инсулин го зголемува нивото на триглицериди и останати маснотии во крвта. Тоа им пречи на бубрезите и доведува до зголемен крвен притисок. Ова, пак, го зголемува ризикот од срцеви болести и мозочен удар. Инсулинската резистенција, веројатно, вклучува низа генетски фактори, но прекумерната телесна тежина и неактивноста се главни причинители. Долгогодишната консумација на рафинирани намирници е најпознатата причина за метаболен синдром, па може да се каже дека оваа состојба оправдано се јавува заради човечка вина.

Симптоми на метаболен синдром:

Луѓето кои боледуваат од метаболен синдром имаат три или повеќе пореметувања врзани за метаболизмот, вклучувајќи: дебелина, зголемен крвен притисок, високи нивоа на шеќер во крвта, висок холестерол.



ЛЕКУВАЊЕ: 

Агресивните промени во начинот на живот можат да ја подобрат состојбата. На пример, губењето на тежината, зголемената физичка активност, оставањето на цигарите можат да помогнат во намалувањето на крвниот притисок, да го намалат нивото на холестерол и шеќер во крвта. Овие промени се клуч за намалување на ризикот.

  • Се препорачуваат 30 минути вежбање со умерен интензитет, секој ден;
  • Губењето на само 5 до 10 отсто телесна тежина може да го намали нивото на шеќер во крвта, а со самото тоа и ризикот од дијабетес;
  • Важно е да се храните здраво и разнолико.
  • Се препорачува медитерански тип на исхрана со многу овошје, зеленчук, риба и интегрални житарки;
  • Медитеранската исхрана подразбира внес на незаситени масни киселини – превенствено од маслиновото масло.
  • На дневна база потребно е да се внесува овошје, зеленчук, мешунки, интегрални житарки, немасни млечни производи.
  • Еднаш неделно да се јаде риба, односно релативно малку да се консумира црвено месо.
  • Оставете ги цигарите – пушењето ги влошува последиците од метаболниот синдром.