Миењето раце со ладна вода е еднакво ефикасно во убивањето бактерии како и миењето со топла или врела вода, тврдат група американски истражувачи кои правеле експеримент. Во студијата во која учествувале само 20 луѓе утврдиле дека рацете после миење со вода чија температура изнесува 15 Целзиусови степени биле еднакво чисти како и кога користеле вода загреана на 38 степени.
Ова сознание би можело да донесе големи заштеди во потрошувачката на електричната енергија, пред се, во рестораните, со оглед на тоа дека е важечка препораката на американските служби за јавно здравје, рацете во прехранбената индустрија да се мијат исклучиво со топла или врела вода.
Истражувајќи ја користа од овој совет научниците ја менувале не само температурата на водата, туку и количеството на сапун со кој учесниците ги миеле рацете претходно прекриени со нечистотија. Се покажало дека нема разлика во ефикасноста на отстранувањето бактерии, без оглед на тоа дали водата е 15, 26 или 38 степени. Сепак, напоменувааат дека оваа студија е премногу мала и дека треба да се прават дополнителни истражувања за тоа како најлесно да се ослободиме од бактериите.
