Мозокот живее и кога срцето престанува да работи

Ова откритие сугерира дека свеста е присутна многу време откако телото на човекот кој умира повеќе не дава знаци на живот.

Во последните моменти од животот во човековиот мозок се јавува електромагнетна активност која научниците ја нарекуваат „ширење депресија“, наведено е во магазинот „Анали на неврологија“. Невролозите го истражувале мозокот на пациенти на смртна постела и ја набљудувале силната активност која се појавува и му претходи на конечното гаснење на повеќето витални органи. Ова откритие сугерира дека свеста е присутна многу време откако телото на човекот кој умира повеќе не дава знаци на живот, како и дека таа свесност може да се задржи дури и до пет минути пред да се исклучи и човековиот најсложен орган – мозокот.

Тимот на невролози, кој работел на ова истражување, постојано ги надгледувал сигналите во мозокот на деветмина луѓе на смртна постела. Секој од пациентите, од еден во Берлин до еден во Синсинати, имал фатални повреди на мозокот и не ги оживувале. Било откриено дека дури пет минути по престанокот на отчукувањето на срцето човековите мозочни клетки, односно невроните, можат и понатаму да функционираат.

Откако крвта ќе престане да циркулира низ телото, ширењето на „деполаризација“ го означува губитокот на „архивирана“ електрохемиска енергија во мозочните клетки и настапуваат штетни процеси кои, веројатно, водат до смрт, наведуваат научниците. Човековите клетки умираат дури откако крвта ќе престане да тече низ вените затоа што така мозокот останува без кислород. Научниците наведуваат дека никогаш немале метод со кој би го дијагностицирале точниот момент на умирање на мозокот и дека немаат начин со сигурност да утврдат кога точно се губи способноста за свесност. Овие дијагностички истражувања ќе бидат корисни во иднина, затоа што би можеле да помогнат при престанокот на работата на срцето или мозочен удар за враќање на крвотокот во функција.