Дури и десетминутен разговор со некое лице може да го подобри памтењето и интелигенцијата, открило новото американско истражување, кое го спроведе Универзитетот во Мичиген.
„За време на нашето истражување подеднакво ефикасно се покажа и дружењето со другите, исто како и традиционалните ментални вежби за подобрување на памтењето и интелектуалните способности“, изјавил Оскар Ибара, водечки истражувач и психолог на U-M Институтот за социјални истражувања (ISR).
Анализирајќи ги податоците на 3 610 лица на возраст од 24 до 96 години била забележана врската помеѓу високото ниво на социјална интеракција и развиени когнитивни функции.
Социјалната изолација може да има негативен ефект врз интелектуалните способности, како и врз емоционалната стабилност на една личност
Истражувачите извеле и лабораториски тест за да проценат како социјалната интеракција и интелектуалните вежби влијаат на памтењето и менталните способности.
„Откривме дека и кратка интеракција од само 10 минути ја зголемува интелектуалната способност, подеднакво како и вклучувањето во, ајде да ги наречеме, интелектуалните активности“, рекол Ибара.
Што се однесува до резултатите, посетата или кафето кај пријател или сосед може да биде подеднакво важна за острината на умот, како и секојдневното решавање на крстозбори.
Ибара нагласил дека социјалната изолација може да има негативен ефект врз интелектуалните способности, како и врз емоционалната стабилност на една личност.
