Водете смета за должината на престојот на снег додека има сонце, особено ако немате соодветна опрема затоа што може непријатно да ве изненади снежното слепило. Само час или два престој на снег без очила е доволно за појава на снежно слепило, кое инаку како задоцнета реакција се јавува дури по 6-12 часа од изложувањето, предупредуваат стручњаците.
Се јавува како резултат на ултравиолетовото зрачење кое на планина е многу поголемо (рефлексијата е трипати посилна отколку онаа од површината на морето). Разредениот планински воздух сето тоа уште повеќе го потенцира. Личноста со снежно слепило има црвени очи и замаглен вид, чувствува гребење и болка во двете очи, а почнува и да и пречи светлина.
Доколку ви се случи вакво нешто обидете се да ја ублажите состојбата со ладни водени облози на очите. Ако носите леќи обавезно извадете ги и не ги ставајте додека престојувате на планина. Во спротивно, тие може да доведат до оштетување на рожницата, што ќе го забави опоравувањето на очите.
За опоравувањето да се забрза, во очите треба да се ставаат вештачки солзи или гелови за навлажнување, кои ја поттикнуваат епителизацијата на оштетената површина. Носењето големи заштитни очила, добро припиени за лицето, треба да е императив на секој скијач или вљубеник во природата и снегот. Истото важи и за очилата со диоптрија, кои, исто така, мора да бидат добро фиксирани. И никогаш не треба да се вадат, дури и тогаш кога оставаат впечаток дека се замаглени. Затоа што само еден час без нив може да предизвика проблеми. И најважно од се, очилата што ги носите треба да имаат ознака дека штитат од УВ зрарчењето. Доколку се навистина квалитетни, тогаш заштитната моќ им е и до 98 проценти, нагласуваат стручњаците.
