Повеќето од нас се свесни дека прекумерното внесување на сол во организмот не е здраво, но дали размислуваме на кој начин ја внесуваме и колку навистина може да ни наштети.
Прекумерното внесување на сол во организмот може да биде причина за дебелина, заболувања на срцето и белите дробови, заболување на бубрезите, како и зголемување на ризикот од мозочен удар. Намалувањето на прекумерниот внес на сол Светската здравствена организација го вклучи во деветте глобални цели за превенција на хронично незаразни болести.
Препорачаната дневна доза на кујнска сол во организмот е еднаква на една кафена лажичка (6 г)
Во продолжение ви претставуваме неколку начини како да го намалите внесувањето на сол во организмот.
Внимавајте какви грицки избирате
Во вечерната релаксација со филмови или омилена серија радо избираме солени грицки. Наместо готови пуканки направете си сами пуканки со ограничена количина на сол или дури и без сол, а наместо пржени кикиритки одберете кикиритки во лушпа.
Заменете ја солта со други зачини
За да ја намалите употребата на солта во подготовката на јадења, од голема помош може да ви бидат зачините. Наместо сол, дајте им шанса и на другите зачини, експериментирајте со рузмарин, босилек, кромид, пиперка или мелена пиперка.
Научете да го контролирате внесот на сол во организмот
Внесувањето на сол може да се намали ако станеме свесни за храната што содржи сол. „Скриената сол“ може да ја избегнеме ако се навикнеме да ги читаме декларациите на производителите.
Бирајте производи со пониска содржина на сол
Највисока количина на сол, повеќе од 75 %, внесуваме преку храната и затоа е неопходно да бираме производи на кои јасно е означено дека имаат пониска содржина на сол.
