ЗДРАВО И ВКУСНО: Грицкајте без грижа на совест

Во продолжение ви нудиме листа на здрави намирници кои слободно можете да ги консумирате и пред спиење

Само што вечеравте, но вашиот стомак е сè уште празен, а вие не можете да спиете поради глад. Дефинитивно ви треба нешто за јадење, но тоа не смее да биде обилен оброк, туку мала количина на храна или здрави грицки кои нема да и наштетат на вашата линија.

Оброкот пред спиење нема да ве здебели, се додека не ја надминувате бројката на потребни дневни калории.

Пред да легнете, не би требало да консумирате повеќе од 300 калории, а последниот оброк треба да биде најмалку еден час пред да заспиете

Ако често чувствувате глад по вечерата, дефинитивно треба да размислите каква вечера треба да подготвите. Испланирајте избалансиран оброк кој вклучува протеини, влакна, јаглени хидрати, здрави масти и многу зеленчук.

Но, сепак, ако ве „стегне“ глад пред спиење, постои решение. Ние ви нудиме листа на здрави, вкусни намирници кои слободно може да ги консумирате пред спиење.

Боровинки

Ако не можете да набавите свежи боровинки, замрзнатите се, исто така, добра опција. Тие се одлична замена за благо, а добрата вест е дека имаат ниска калориска вредност. Богати се со витамини А, Ц и К и растителни влакна. Одличен извор на флавоноиди, особено антоцијанини со антиоксидантни и антиинфламаторни својства. Освен како оброк пред спиење, можете да ги јадете и меѓуоброк во текот на денот. Ставете ги во шејк, смути или овесна каша.

Крекери

При изборот на крекери важно е да се обрне внимание на количината на сол, шеќер и нездрави масти што ги содржат истите. Крекерите кои се полни со протеини и влакна го забрзуваат метаболизмот и помагаат во обнова на цревната флора. Тие се брзо и здраво решение кога ќе почуствувате напад на глад. Добро е секогаш да ги имате при рака како прва помош за заситување.

Пуканки

Смоки, чипс и солени грицки сигурно се првата помисла која ја врзуваме со вечерното опуштање пред телевизор. Но многу подобар избор се пуканките кои самите ќе ги подготвите. Може слободно да изедете три шолји пуканки, бидејќи имаат само 93 калории, 19 г јаглени хидрати и 3,5 г влакна.

Грчки јогурт

Грчкиот јогурт е популарен, здрав производ полн со хранливи материи и протеини, кои овозможуваат квалитетна регенерација на мускулите. Има пониско ниво на лактоза од класичниот јогурт и затоа е полесно сварлив и се препорачува на сите оние кои се нетолерантни на лактоза. Додадете една лажица масло од ленено семе во јогуртот и ќе добиете оброк богат со протеини, влакна и омега масни киселини.

Бадеми

Полни со протеини, влакна, магнезиум, витамини Е и Б, бадемите се одличен избор за вечерни грицки. Магнезиумот го подобрува расположението, ги спречува грчевите и главоболката, но, исто така, позитивно влијае и на квалитетот на спиењето. Витаминот Е ја штити кожата, а витаминот Б дава енергија и му помага на метаболизмот. Бадемите треба да бидат вклучени во менито, бидејќи се важни за редовно варење, за зачувување на здравјето на срцето и служат во превенција од дијабетес тип 2.

Темно чоколадо

Научно е докажано дека темното чоколадо (кое содржи 70 % какао), го намалува крвниот притисок, и дава на кожата поздрав и поубав изглед, ги подобрува функциите на мозокот и е одличен извор на железо, фосфор, калиум и магнезиум. Ако го консумирате во мали количини, не мора да се плашите дека ќе се здебелите. Имено, американските истражувачи откриле дека луѓето кои редовно консумираат темно чоколадо (до 5 пати неделно) имаат помалку масни клетки, отколку оние кои немаат навика да јадат темно чоколадо.

Моркови

Морковите се богати со хранливи материи и влакна. Тие се нискокалорични и пријатни за јадење, па затоа се и идеална намирница која треба да биде присутна на вашето мени. Најпознатата состојка на морковот е антиоксидантот бета каротен кој му дава интензивна портокалова боја. Тој штити од болести на срцето и карциноми, а во човековиот организам се трансформира во активен облик на витамин А, кој е неопходен за здравјето на очите.