Доколку често ве мачи умор на очите или полошо гледате при слаба светлина, освен консултација со офталмолог, би било добро во исхраната да вклучите повеќе намирници кои придонесуваат за подобар вид.
За почеток јадете повеќе намирници богати со бета-каротен како што се батат (сладок компир) и морков. Бета-каротенот во организмот се претвора во витамин А. Исхраната богата со овој витамин го намалува ризикот од катаракта и старосна макуларна дегенерација, додека еден од првите симптоми на недостаток на витамин А е ноќното слепило.
Јајцата, пред се, жолчките, исто така, претставуваат одличен извор на витамин А, како и на антиоксидантите лутеин и зеаксантин, со кои обилуваат магдоносот, како и тиквата. Магдоносот содржи и витамин Ц кој, исто така, го намалува ризикот од катаракта и губење на видот како резултат на макуларна дегенерација.
И витаминот Д е важен за здравјето на очите – истражувањата покажале дека адекватниот внес на овој витамин може да ги намали шансите за развој на кратковидост. Меѓу најдобрите прехранбени извори на витамин Д спаѓаат лососот и сардините, а оваа риба претставува одличен извор на омега-3 масни киселини, кои помагаат во превенцијата на сувоста на очите.
