Наутот не е баш ниско калорична храна, но, од друга страна, пак, е богат со многу корисни и потребни нутриенти: сложени јаглехидрати, протеини, масти и влакна. Уште една важна карактеристика за ова растение е тоа што е исклучително богат извор на фолна киселина, а и неговата содржина на железо не може да остане незабележана. Други минерали и витамини кои се содржат во наутот се: манган, магнезиум, цинк, бакар, витамин Б6 и тиамин.
Една шолја наут задоволува 25 % од дневните потреби за железо кај жени и дури 50 % од дневните потреби за железо кај мажи.
Доколку сме запознати со значењето на влакната за нашето здравје тогаш нивната голема застапеност во наутот може да биде значајна причина за да почнеме да го употребуваме ова растение во исхраната. Влакната ви помагаат да се чувствувате сити и да консумирате помалку храна доколку треба да ја намалите телесната маса. Наутот содржи растворливи влакна кои го намалуваат лошиот холестерол и го одржуваат шеќерот во крвта во нормални граници. Повисокиот внес на влакна е поврзан со намален ризик од појава на одредени типови канцерогени заболувања на дигестивниот систем.
Фолната киселина е клучна за правилен развој и раст на клетките, а посебно е неопходна за правилен развој на фетусот. Една шолја наут содржи количина на фолна киселина која задоволува 70 % од дневните потреби за фолна киселина за жени и 50 % од дневните потреби за фолна киселина за мажи.
Наутот е одличен извор на протеини, една шолја наут содржи повеќе протеини отколку две големи јајца.
