Крвавењето од носот најчесто доаѓа ненадејно и без предупредување. Може да изгледа страшно, но најчесто е потполно безопасно.
„Иако количински знае да биде многу, крвта всушност доаѓа од малите крвни садови на носната преграда“, вели д-р Адријан Муншер, заменик-раководител на Одделот за оториноларингологија во Универзитетската болница во Хамбург.
Кај возрасните пукањето на крвни садови во носот обично го предизвикува ненадејното зголемување на крвниот притисок. Причина, исто така, може да биде и комбинација на сува, иритирана слузница на носната преграда и пораст на притисокот
На крајот на носната преграда се среќаваат многу садови, па крвавењето може да биде предизвикано дури и од мала повреда, како резултат, на пример, на копање на носот.
Како да го запрете крвавењето?
Ладниот облог на вратот веднаш ќе предизвика брзо стегање на крвните садови. Исто така, помага и да се затвори носот со прстите „што делува како завој“, додава Муншер.
Зафрлувањето на главата наназад, што порано се практикуваше, повеќе не е толку добра идеја. За да се спречи протокот на крвта низ грлото до желудникот, подобро е благо да се навалите нанапред.
Ако крвавењето е тешко да се запре или ако често се повторува, треба да посетите лекар, советува Муншер. Во тој случај, покрај хронично зголемениот притисок, причина би можеле да бидат и антикоагулантни лекови или, во ретки случаи, назален полип или тумор.
