Воспалението на мочниот меур, исто така познато и како инфекција на долниот уринарен тракт, ги погодува и обата пола, но жените се повеќе склони кон овој здравствен проблем, кој може да биде многу упорен. Кај нив, мочниот канал се наоѓа поблиску до анусот, што значи дека бактериите имаат за поминување пократок пат за да стасаат до мочниот меур.
Во повеќето случаи воспалението на мочниот меур се појавува одеднаш и трае кратко (акутно), но понекогаш може да се задржи и подолго време (хронично воспаление). Раниот третман е клучен за спречување на ширење на инфекцијата. Во нормални околности, бактериите кои предизвикуваат воспаление на мочниот меур преку уринирање ќе бидат отстранети од телото, но во некои случаи, бактериите можат да се залепат на ѕидовите на мочниот меур и брзо да се размножат со што се оневозможува способноста на организмот да ги уништи, што резултира со воспаление на мочниот меур.
Раниот третман е клучен за спречување на ширење на инфекцијата
Најчесто воспалението на мочниот меур е предизвикано од Ешерихија коли, бактерија која е природно присутна во дебелото црево. Воспалението може да се појави доколку бактериите се намножат во телото или ако не се исфрлат преку мокрењето. Исто така, тоа може да се прошири и на бубрезите. Во тој случај, ќе имате висока температура со силна болка во пределот на бубрезите, а урината под микроскоп ќе биде полна со бактерии.
Меѓу факторите кои можат да го зголемат ризикот од воспаление на мочниот меур кај жените и мажите се недоволниот внес на течности – до воспаление на мочниот меур може да дојде доколку човек пие малку течности, особено во летните месеци, во текот на грејната сезона или кога постојат првични симптоми на воспаление на мочниот меур. Задржување на урината- доколку пациентите целосно не го испразнат мочниот меур- тогаш до воспаление доаѓа полесно, а потешко се лекува. Зголемена простата- доколку човек потешко мокри и последователно му заостанува урина во мочниот меур, тоа може да биде причина за почеток на воспаление на мочниот меур. Меѓу другите фактори се и инконтиненција, бременост, која сама по себе не е причина за чести воспаленија, но добивањето на тежина и понекогаш потешкото одржување на хигиената може да го зголемат ризикот од воспаление. Пациентите кои имаат дијабетес имаат поголем ризик за развој на сите инфекции, па и оние во мочниот меур. На ризик се и постарите жени кај кои постои промена во квалитетот на слузницата на матката поради хормонални промени.
