Утрата стануваат се помрачни, а деновите се постудени – тоа значи само една работа – доаѓа зимата. Со неа стигнуваат и неизбежните настинки и кивањето. Овие нималку наивни вируси се шират нашироко, а еднаш кога некој од вашите домашни или колеги ќе се разболе, се што можете да направите е да го чекате својот ред. Кивањето е природен начин на кој телото се справува т.е. ги отстранува со бацилите од носот, а правилниот начин може да ви помогне да го запрете нивното понатамошно ширење.
А судејќи според стручњаците, најдобар начин да се заштитите себе и другите е да кивате и кашлате во лактот, а не во раката.
Проблемот со кивањето и кашлањето во раката, па дури и кога имате шамиче, е дека тој вирус може да пронајде пат низ марамчето до вашите раце и потоа понатаму да се прошири по телото. Марамчето ќе задржи одреден дел од вирусите, но никако не е стоотстотна заштита, предупредуваат стручњаците.
Ако сте во ситуација подолго време да не можете да ги измиете рацете, најдобро е да си кивнете во лактот. Затоа што иако не можете да ги видите, постојат илјадници капки преполни со бацили кои завршуваат на вашата рака. А ако веднаш не ги измиете рацете можат да завршат и на вашиот телефон, тастатурата, шолјата за кафе и сите предмети кои ги допирате во текот на денот.
Најлошо од се тоа што луѓето киваат во својата рака и продолжуваат да се однесуваат и да функционираат сосема нормално, како ништо да не се случило, а така само ги шират вирусите. Иако се смета дека единствениот начин да настинеме е ако некој кива или кашла директно во нашето лице, сепак подеднакво важен е и контактот со рацете.
