Неделата за подигање на свеста за алергија на храна е иницијатива креирана од FARE (Food Allergy Research and Education). Целта на оваа недела е да се подигне свеста за различните алергии на храна и да се подобри јавното разбирање за нешто што понекогаш може да биде и животно-загрозувачка состојба.
FARE е една од најголемите светски непрофитни организации кои се специјализирани за подигнување на свеста за алергија на храна, едукација, истражување и обезбедување релевантни информации. Таа е основана во 1991 година од страна на мајка, чија ќерка била дијагностицирана со алергија на млеко и јајца. Одбележувањето на Неделата за свест за алергија на храна почнало во 1998 година, а оваа година го слави своето 20-годишно издание.
Целта на неделата за подигнување на свеста за алергија на храна е апел до луѓето да преземат акција и да влијаат, во името на милиони луѓе ширум светот кои страдаат од алергија на храна.
Како да ги препознаете симптомите на алергија на храна навреме
Симптомите на алергија на храна обично се јавуваат во рок од неколку минути до неколку часа по консумирање на храната на која сте алергични. Алергиската реакција на храна може да влијае на кожата, гастроинтестиналниот тракт и, во најсериозните случаи, на кардиоваскуларниот систем.
Реакциите може да варираат од речиси незабележливи до тешки, вклучувајќи и потенцијално опасна по живот анафилакса. Првите знаци на алергиска реакција може да бидат многу благи, но симптомите може брзо да се влошат, а она што предизвикало прв пат блага реакција, следниот пат може да доведе до тешка реакција.
Благите до умерени симптоми вклучуваат:
- Проблеми со кожата (чешање, егзема или осип);
- Гастроинтестинални проблеми (гадење, повраќање, грчеви, дијареја);
- Респираторни проблеми (шмркање, кашлање, кивање).
Тешките симптоми вклучуваат:
- Воспаление и отекување (усни, очни капаци, лице, јазик, грло);
- Вертиго и несвестица;
- Болка во градите;
Тешки симптоми, сами или во комбинација со поблаги симптоми, може да бидат знаци на опасна анафилакса, што бара итен третман.
Анафилакса
Анафилаксата е бурна алергиска реакција која обично зафаќа повеќе органски системи и бара итно лекување.
Анафилаксата може да ја предизвикаат голем број на фактори, но најверојатно се јавува како одговор на протеините од храната. Обично започнува со симптоми на горниот респираторен тракт или кожни симптоми кои можат да се развијат многу брзо и да го загрозат животот.
Понекогаш мала количина на одредени намирници може да предизвика анафилактичен шок. Тоа се намирници кои спаѓаат во осумте најчести алергени од храна: кикиритки, јајца, млеко, морски плодови, пченица, риба, соја и други јаткасти плодови.
