Луѓето кои не пијат доволно вода имаат поизразен биолошки одговор на стрес, покажува научна студија.
Истражувачите откриле дека луѓето кои пиеле помалку вода ослободуваат повеќе од хормонот на стрес – кортизол – иако не чувствувале поголема жед во споредба со оние кои пиеле повеќе. Чувањето шише вода при рака за време на стресни периоди може да биде корисно за долгорочното здравје, сугерираат научниците.
Студијата, спроведена од експерти од Универзитетот Ливерпул Џон Мурс (Liverpool John Moores University – LJMU), опфатила 16 лица кои пиеле помалку од 1,5 литри вода дневно и 16 лица кои редовно ги исполнувале препорачаните дневни упатства за внес на течности.
Научниците се потпирале на упатствата на Европската агенција за безбедност на храната (EFSA), кои препорачуваат мажите да пијат 2,5 литри вода дневно, а жените два литри. Сепак, потребите за вода може да бидат поголеми кога е жешко, кога лицето е физички активно, за време на закрепнување од болест или за време на бременост и доење.
Учесниците во студијата биле следени седум дена – биле земени примероци од урина и крв – по што биле подложени на лабораториски тест за стрес. Тестот вклучувал симулација на интервју за работа: секој учесник имал 10 минути да се подготви, а потоа дал интервју пред лажна камера пред панел од три лица во бели мантили. Потоа следела ментална аритметичка задача.
Професорот Нил Вош од LJMU го опиша тестот како „навистина вознемирувачки“.
„Знаеме дека луѓето кои имаат низок дневен внес на течности и не ги исполнуваат препораките веројатно не се доволно хидрирани. Но, не знаевме дали кога се во стресна ситуација под контролирани услови, ќе имаат посилен хормонален одговор“, рече Вош.
Научниците земале примероци од плунка од учесниците пред и по тестот за да ги измерат нивоата на кортизол. Кортизолот, познат како хормон на стрес, го произведуваат надбубрежните жлезди како одговор на стресот, а игра и улога во имунолошкиот одговор, метаболизмот и регулирањето на крвниот притисок.
Тимот открил дека нивоата на кортизол биле повисоки кај оние кои пиеле помалку вода. Професорот Шо забележал дека физичките реакции на стрес – како што се забрзан пулс, потење на дланките и сува уста – биле слични во обете групи.
„Двете групи чувствувале слични нивоа на анксиозност и имале слично зголемување на срцевиот ритам за време на тестот за стрес“, рече тој. „Но, луѓето кои биле слабо хидрирани, бидејќи не пиеле доволно вода секој ден, имале многу посилен одговор на кортизол.“
Кортизолот е примарен хормон на стрес во телото, а прекумерната реакција на стрес е поврзана со поголем ризик од срцеви заболувања, дијабетес и депресија.
Заклучок
Пиењето вода секој ден, а особено во стресни ситуации му помага на телото во справување со стресот, а исто така на долг рок придонесува за подолг животен век.
