„Нашиот лек против рак ќе биде делотворен од првиот ден, лекувањето ќе трае неколку недели и ќе има мали или никакви нуспојави, а цената ќе му биде значително пониска од другите третмани против рак кои моментално постојат на пазарот“, истакнал Дан Аридор, претседател на управата на АЕБИ за The Jerusalem Post.
Лекот е наречен Му-та-то (multi-target toxin), а научниците кои работат на неговиот развој велат дека тоа во суштина е антибиотик против рак.
„Лекот истовремено делува така што користи комбинација на пептиди за секоја клетка на ракот, што може да се спореди со тројниот коктел кој помогна АИДС да се промени од смртоносна во хронична болест. Лекувањето на ракот со овој лек ќе биде индивидуално. На секој пациент ќе му се прави биопсија, а анализата ќе покаже кои рецептори се прекумерно изразени за да му се даде молекулски коктел потребен за лекување на неговата болест. Но за разлика од ХИВ и АИДС каде пациентите мораат да земаат коктел до крајот на животот, клетките на ракот со овој лек брзо би биле уништени, а лекувањето би траело неколку недели“, објаснил доктор Илан Морад, генерален директор на АЕБИ за Jerusalem Post.
Доктор Морад открил дека веќе се спроведени истражувања врз глувци и дека се задоволни како реагирале, како и дека немале никакви нуспојави на лекот. Исто така, спровеле испитувања ин витро, а најавил и дека наскоро ќе стартуваат со клинички испитувања кај луѓе, кои би можеле да бидат завршени за неколку години. Иако научниците од израелската компанија се мошне оптимистични кога е во прашање новиот потенцијален рек за рак, факт е дека ваквите истражувања траат со години пред да се применат кај луѓето, па останува отворено прашањето како научниците можат да тврдат дека за една година ќе имаат лек за рак.
Познатиот хрватски истражувач на тумори, проф. Иван Ѓикиќ за Јутарњи лист, исто така, го изразил своето сомневање и искоментирал дека многу работи во оваа најава звучат нелогично и несериозно, како и дека никој не може да знае како ќе заврши ова клиничко истражување пред неговото завршување.
