Состојбата кога едниот или двата тестиси за време на феталниот развој не се спуштиле низ ингвиналниот канал до скротумот се нарекува крипторхизам. Вообичаено, процесот на спуштање на тестисите се одвива по 28 -та недела од бременоста, но постојат одреден процент на бебиња кај кои оваа промена не се случува пред раѓањето, па тестисот застанува или на првобитното место од развојот во стомачната празнина или на својот пат кон скротумот се заглавува во слабинскиот или ингвиналниот канал. Кај дел од нив, овој процес на спуштање се случува и во првите неколку месеци по раѓањето.
Педијатрите велат дека оваа состојба е почеста кај предвремено родените бебиња. Обично се работи за само еден неспуштен тестис, а само кај 10 % од нив се неспуштени и двата тестиси. Главниот знак дека имате проблем со „неспуштени тестиси“ е доколку едниот или двата тестиси не ги гледате или чувствувате на допир.
Се советуваат родителите за време на капењето на своите деца да ги прегледуваат тестисите. Неспуштен тестис обично се открива веднаш по раѓањето откако мајката ќе си замине од болница. Побарајте медицинска помош доколку ситуацијата не се смени во првите четири месеци по раѓањето. Лекувањето на неспуштениот тестис кога детето е помало го намалува ризикот од компликации во понатамошниот живот, како што се неплодноста и можноста од појава на карцином.
Кај тинејџерите кај кои нормално биле спуштени двата тестиси може со текот на времето да се појави состојба на вовлекување на тестисот. Вовлечениот тестис може да се движи напред-назад. Оваа промена се случува заради опаѓање на мускулниот тонус во скротумот.
Точната причина за неспуштени тестиси е непозната. Комбинацијата од генетиката, здравјето на мајката, стресот, земањето хормонска терапија и надворешните фактори.
Ризик фактори
- Предвремено породување;
- Ниска родилна тежина;
- Семејна историја на неспуштени тестиси или други проблеми со гениталиите;
- Даунов синдром;
- Употреба на алкохол за време на бременоста;
- Пушење цигари за време на бременоста;
- Пестициди;
- Компликации за време на бременоста.
