Во спотот за песната „Smooth Criminal “ од 1987 година кралот на поп музиката Мајкл Џексон изведува движење, кое биомеханички е невозможно. Тајната на изведбата ја открива тим на неврохирурзи кои објаснуваат детално како е движењето изведено.
Џексон изведува движење во кое се наведнува под агол од 45 степени, и тоа од глуждовите, а цело време неговото тело е исправено како стап. Оваа илузија многумина, главно неуспешно, се обиделе да ја имитираат, а експертите предупредуваат дека овој потег не треба да се обидувате да го правите дома за случајно да не се повредите.
За време на изведување на потегот, притисокот се префрла од ’рбетните мускули (erector spinae) на Ахиловата тетива (Achilles tendon,) напиша тимот од тројца неврохирурзи од индискиот Институт за медицинско образование и истражување во Индија во „Journal of Neurosurgery:Spine.“
„Повеќето тренирани, искусни танчари кои имаат добра сила на централниот дел од телото може да се наведнат максимум 20 до 30 степени нанапред. Мајкл Џексон успеа тоа да го направи под агол од 45 степени, и на тој начин, всушност, направи нешто неверојатно”, изјавил Манџула Трипати, кој работел на истражувањето
Неврохирурзите откриле дека Мајкл Џексон успеал да го направи ова движење благодарение на специјално дизајнираните чевли, но и на својата сила.
„Дополнителна флексибилност му овозможи V обликуваниот отвор на дното на петата, бидејќи неговите чевли имаат посебен дел кој го држи цврсто на земјата и му овозможува да се навали напред, поради тежината која и пркоси на гравитацијата“, објаснија истражувачите.
Пред да најде вакви чевли, Мајкл Џексон го изведувал ова движење со помош на јажиња и ремени завиткани околу половината. Експертите истакнуваат дека, без оглед на помагалата што ги имал и тогаш, за ова движење е потребно да се има голема сила на ‘рбетните мускули и екстремитетите.
