Дилемата е дали станува збор за „бабини деветини“ или навистина може да се разболиме ако сме изложени на ниски температури, дури и на само неколку минути?! Еве што вели науката. Долготрајното изложување на студ, најчесто во лошо загреани домови, секоја зима во Велика Британија убива околу 40 000 луѓе. Многумина умираат од срцев удар или шлог, предизвикани од долготрајно изложување на ниски собни температури (под 18 степени) заради што крвните садови се собираат бидејќи телото се обидува да ја зачува својата основна температура од околу 36 до 37 степени. Тоа значи дека срцето мора посилно да пумпа крв за таа да циркулира низ стеснатите крвни садови, како резултат на што доаѓа до зголемен крвен притисок со што се зголемува ризикот од смрт кај личноста со постоечки срцеви проблеми.
Но она што не е до крај објаснето е дали „истрчувањето“ без капут или со мокра коса кога надвор е минус може да претставува ризик за здравите луѓе.
Студија на Јеил открила дека риновирусите кои предизвикуваат настинка се репродуцираат многу поефикасно кога температурата во носната шуплина нагло ќе се спушти (во случајов до отприлика 33 степени во однос на вообичаената телесна температура од 37 степени). Овој пад на температурата се случува најчесто заради нагло преминување од топла просторија на надворешен студ.
Студија од 2015 година направена кај глувци открила дека вирусите „цветаат“ на пониски температури, делумно и затоа што имунолошкиот систем на телата е помалку во состојба да произведе протеини потребни за уништување на инвазивните организми кога условите се постудени.
„Колку температурата е пониска толку нашиот имунитет има намалена способност да се избори со вирусите“, велат истражувачите. Со други зборови, советите на нашите мајки и баби да се завиткаме од глава до пети во топло за да спречиме настинка, имаат и научна потврда.
