Според новите упатства добиени од Американската асоцијација за срце (АHА) и Американскиот колеџ за кардиологија, дефиницијата за хипертензија се менува и за покачен крвен притисок се смета вредноста од 130/80 mm Hg, во однос на претходните 140/90 mm Hg.
Ова значи дека дијагноза хипертензија отсега ќе имаат три пати повеќе мажи помлади од 45 години и двојно повеќе жени помлади од 45 години. Во согласност со новите насоки, во моментов во Америка од висок крвен притисок страдаат околу 46 проценти од населението или повеќе од 103 милиони луѓе.
За нормален крвен притисок и понатаму се смета систолен притисок од 120 милиметри на живиниот столб (mm Hg) и 80 mm Hg дијастолен притисок. Упатствата се објавени во списанието „Хипертензија“ на Американскиот колеџ за кардиологија, а неодамна беа презентирани и на годишната конференција на Американската асоцијација на кардиолози во Анахајм, Калифорнија.
Ова е прва ревизија на упатствата за хипертензија уште од 2003 година, кога, во согласност со старите насоки, висок крвен притисок имаа околу 32 проценти од Американците.
Д-р Пол Велтон, професор по епидемиологија на Универзитетот Џон Хопкинс во Балтимор, вели дека крвниот притисок кој изнесува 130/80 mm Hg не значи дека треба веднаш да почнете со земање лекови за негово намалување.
„Јас би рекол дека ова е како жолтото светло на семафор, предупредување дека треба да го промените начинот на живот за да го намалите притисокот, но без употреба на лекови“, додава Велтон, потсетувајќи дека станува збор за губење на тежината, физичка активност, здрав начин на исхрана, избегнување на големи количини сол, алкохол и стресен животен стил.
Новите упатства ја елиминираат категоријата „предхипертензија“, која се однесуваше на систолен притисок од 120 до 139 mm Hg и дијастолен помеѓу 80 и 89 mm Hg.
Упатствата, исто така, укажуваат на важноста од редовна проверка и мерење на крвниот притисок кај пациенти со хипертензија
Треба да се има предвид дека хипертензијата, после пушењето, е уште една водечка причина за срцеви заболувања и мозочни удари.
