Лепилото кое е наречено MeTro е толку ефикасно што може да ја залепи раната за 60 секунди. Се аплицира со помош на инјекција директно на раната и е направено од природен протеин тропаеластин. Откако ќе се нанесе се активира со помош на УВ светло при што целосно ја затвора раната, дури и на влажно ткиво, поради што повеќе нема потреба од употреба на конци. Овој производ има голема предност и поради тоа што може многу добро да делува на органите кои го менуваат својот облик, како што се белите дробови и срцето.
Во студијата која е објавена во магазинот „Science Translational Medicine“ се вели дека лепилото брзо и успешно затвора резови на артерии и бели дробови кај стаорци и свињи.
Професорот Назим Анаби од Универзитетот Northeastern вели: „Посебноста на лепилото MeTro е во тоа што кога ќе дојде во контакт со површината на ткивото се претвора во одреден вид на гел и не истекува.“
Во производството на MeTro е користен природен еластичен протеин во комбинација со молекули кои се чувствителни на светлина
Оваа технологија ја развил биохемичарот, проф. Ентони Вајс од Универзитетот во Сиднеј во соработка со проф. Али Кадемхосеини од Harvard Medical School.
Проф. Вајс го споредува ова лепило со силиконскиот лепак за плочки во бањата и кујната.
„Кога ќе го погледнете MeTro ќе видите дека се однесува како течност која ги исполнува пукнатините и се прилагодува на обликот на раната“, вели Вајс.
Се разбира, сега треба да се направат бројни клинички испитувања на луѓето, но научниците се прилично оптимисти кога станува збор за идната важна улога на нивното хириршко лепило.
Тоа би можело да се применува во многу области на медицината и би можело да послужи за унапредување на болничката хирургија и со самото тоа за побрзо закрепнување на пациентите после операција.
Научниците очекуваат дека неговата примена на луѓе би можела да започне за три години.
