Ниските температури во текот на зимските месеци делуваат обесхрабрувачки врз повеќето луѓе и нивното излегување надвор, а камоли трчање. Но новото истражување покажува дека специфичните услови, т.е. студеното време е всушност поволно за трчање, бидејќи максимално го зголемува ефектот.
Трчањето во зима на ниски температури, со ветер и по лизгав терен претставува предизвик, но многу од оние што трчаат се на мислење дека трчањето во такви услови е, всушност, полесно отколку кога времето е топло
Причината треба да се бара во тоа што пониските температури го намалуваат стресот во организмот со тоа што отчукувањата на срцето се побавни, а степенот на дехидратација е помал во однос на топлите услови, велат научниците од Универзитетот Сент Мери во Лондон.
„Ставивме група на луѓе во еколошка комора, каде што можевме да ги менуваме условите во летни и зимски. Побаравме од нив да трчаат 10 километри во различни околностите при што преземавме различни мерења на секој учесник за време на трчањето“, објасни Џон Бруер, професор на применети спортски науки на Универзитетот Сент Мери, Лондон.
Секој чекор при трчањето произведува топлина, вели Бруер. „Оваа топлина се акумулира во телото и може да предизвика штета ако не се ослободиме од неа. Еден од механизмите за губење на таа топлина е потењето, но топлината ја губиме и со тоа што крвните садови ја пренесуваат крвта на површината на кожата која ја ослободува во надворешната средина. Тоа ја отежнува работата на срцето, особено кога се трча по топло време, бидејќи многу потешко се ослободуваме од топлината кога и самата средина е топла“, вели професорот Бруер.
А тој дополнителен напор може да биде значаен. „Нашите наоди укажуваат дека стапката на топлина е за шест отсто поголема во топли услови и дека дехидрација на оние што трчаат во такви временски услови е повисока за повеќе од 30 отсто.“
Бидејќи срцето не мора да вложи толку голем напор за да ја испрати крвта на површината на кожата, тоа значи дека трчањето на пониски температури бара помалку енергија. На тој начин, вели Бруер, сериозните спортисти можат да ги подобрат своите лични резултати дури и за неколку драгоцени секунди со тоа што ќе трчаат во зима, а не во лето.
