Што влијае врз одлуката за иднината на врската откако партнерот ќе направи неверство?
Психолозите од Универзитетот Невада обединија две истражувања во кои сакаа да дознаат што е пресудно за луѓето при донесување на одлуката дали ќе ја продолжат врската со неверниот партнер.
Сознанието дека вашиот партнер ве изневерува може да биде потполно избезумувачко. Освен што изневерената страна мора да се справи со ова сознание, честопати се наоѓа и во дилема: дали да остане во врска или да го напушти партнерот.
Како луѓето донесуваат одлука за прекин на врската по неверство?
Научниците Роуни Сроут и Даниел Вајгел од Универзитетот Невада, објавија студија во „Journal of Social and Personal Relationships“, која е всушност здружен труд на две одделни студии, пишува психологот Роберт Бурис во „Psychology Today“.
Во првото истражување учествувале 200 мажи и жени на студентска возраст кои биле во долги врски. Од испитаниците било побарано да го замислат следново сценарио: по караница, нивниот партнер отишол на забава каде што имал сексуален однос со некој друг. После тоа, партнерот изразил желба да премине преку неверството и да остане во врска.
Од половина од испитаниците, исто така, дополнително било побарано да се стават во позиција каде што нивни блиски (семејство и пријатели) навивале за зачувување на врската. На другата половина им било дадено спротивно сценарио – семејството и пријателите ги советувале да ги напуштат своите партнери.
Со овие сценарија во главата, испитаниците решиле серија прашалници, еден од нив го мерел нивното простување кон партнерот. Другите ги испитувале до која мера неверството им го препишувале на однесувањето на партнерот: дали е тој виновен или не.
Психолозите дознале дека одлуката за останување или заминување е опишана како серија на различни процеси. Луѓето чии блиски сметале дека треба да ја прекинат врската силно го обвинувале партнерот и имало помала веројатност да простат и да останат во врска. Процесот бил обратен кај оние испитаници чија социјална мрежа им советувала да останат во таа врска.
Овие резултати се засилени со оние од второто истражување, во кое испитаниците биле навистина изневерени (во реалноста, а не само во главата). Тие од свое искуство на неверството го објасниле ставот кој го имала нивната средина.
Ова истражување не може со сигурност да каже како некој ќе реагира на неверството на партнерот, секој случај има различни околности. Но ова истражување открива дека кога нашите животи се негативно погодени од постапките на другите, нашиот одговор би можел да биде под влијание на други: пријатели и семејство.
