Агенцијата за храна и лекови (FDA) во САД го одобри првиот лек за лекување на постпородилна депресија, проблем кој погаѓа една од девет родилки. Агенцијата соопштила дека станува збор за лек наменет за непрекината интравенозна примена во тек на 60 часа.
До сега, на жените кои страдаат од постпородилна депресија им беа препишувани антидепресиви и им се советуваат разговори со стручни лица. Она што е одлично кај овој лек, велат стручњаците, е што делува брзо и веќе една доза примена низ инфузија нуди олеснување, односно ги намалува симптомите.
Меѓутоа, станува збор за исклучително скап лек, и една доза чини 34.000 долари. Како недостаток се препишува и фактот дека неговата примена бара пациентката да биде во болница за да 60 часа прима инфузија, што дополнително ги зголемува трошоците на лекување. Сепак, стручњаците се надеваат дека овој лек ќе доведе до откривање на нови медикаменти за овој вид на депресија кај жените. Се очекува лекот да биде достапен за употреба во јуни, оваа година.
