Децатачии мајки, шест месеци пред бременоста или за време на бременоста употребувале орални контрацептиви, имаат поголем ризик од развој на леукемија во детството, покажува новото истражување. Зголемениот ризик од леукемија главно се поврзува со употребата на оралните контрацептиви, кои содржат естроген. Но научниците истакнуваат дека апсолутниот ризик од детска леукемија и понатаму е се уште многу низок.
Со оглед на тоа дека речиси и да не постојат фактори на ризик за леукемија во детството, овие резултати покажуваат во која насока би требало да се движат наредните истражувања. Имено, до сега само јонизирачкото зрачење беше значајно поврзано со леукемиите во детството.
Треба да се напомене дека не е забележан зголемен ризик од леукемија кај децата чии мајки користеле орални контрацептиви 6 до 12 месеци пред почетокот на бременоста или дури и порано (пред повеќе од една година), пишува „The Lancet Oncology“
Леукемијата претставува рак на крвта или коскената срж. Се јавува кога телото почнува да акумулира абнормални бели крвни зрнца (леукоцити), при што се намалува бројот и способноста на созреаните крвни зрнца. Зрнцата се нарекуваат абнормални затоа што не можат правилно да созреат. Неспособноста да се созрее е главниот недостаток во леукемијата.
За причините може да се дискутира, но постојат неколку фактори кои влијаат на развој на леукемија: генетски фактори, радијација, хемикалии и вируси.
Најчести видови на леукемија се: акутна лимфобластична леукемија (Acute Lymphoblastic Leukaemia – ALL), хронична лимфоцитна леукемија (Chronic Lymphocytic Leukaemia – CLL), акутна миелоидна леукемија (Acute Myeloid Leukaemia – AML) и хронична миелоидна леукемија (Chronic Myeloid Leukaemia – CML).
Kај децата најзастапена е акутната лимфобластична леукемија (Acute Lymphoblastic Leukaemia – ALL). Се јавува кога леукемијата ги напаѓа зрнцата многу рано во нивниот живот. Ова значи дека зрнцата не созреваат и воопшто не функционираат. Како последица, постои поголема веројатност пациентот со акутен вид на леукемија да страда од инфекции, крвавење и слабокрвност.
